"Bakı-Tbilisi-Qars (BTQ) dəmiryolu xətti layihəsinin ölkəmiz üçün çox böyük əhəmiyyəti var. Azərbaycan ard-arda iki böyük layihəyə imza atır. BTQ dəmiryolu Qərblə-Şərqi birləşdirməklə bərabər İranla Rusiya arasında böyük bir dəmiryolu xəttidir". Bunu Tərxis Olunmuş Hərbçilərin Gəncləri Maarifləndirmə İctimai Birliyinin (TOHGMİB) sədri, hərbi eskpert Emin Həsənli deyib.
Onun sözlərinə görə, Azərbaycan bir növ əməkdaşlıq məkanına çevrilib: "Bu gün dünyanın onlarla dövləti həm regional, həm də beynəlxalq layihələr çərçivəsində Azərbaycanla əməkdaşlıq edir. Sentyabrın 14-də yeni əsrin ən böyük müqaviləsi imzalandı və ölkəmiz əməkdaşlıq məkanına çevrildi. Ümummilli Lider Heydər Əliyev Azərbaycanı qarşıdurma məkanından əməkdaşlıq məkanına çevirdi. Bu gün Ukraynada, Gürcüstanda, Yaxın Şərqdə, Suriyada qarşı-qarşıya duran qüvvələr Azərbaycanla əməkdaşlıq edir. Ermənistan isə bütün layihələrdən kənarda qalıb. Azərbaycan Prezidentinin apardığı uğurlu xarici siyasət nəticəsində Ermənistan BTQ layihəsindən də kənarda qaldı. Azərbaycan-Türkiyə-Gürcüstan, Azərbaycan-Rusiya-İran, Azərbaycan-Türkiyə-Türkmənistan üçlükləri var. Amma Ermənistan heç belə bir üçlükdə təmsil olunmur.
Rəsmi İrəvan ancaq Rusiyanın vassalıdır. Azərbaycan isə Rusiya və Ermənistanla bərabərtərəfli əməkdaşlıq edir. Rusiya prezidentinin açıqlamasından aydın oldu ki, Xəzərin hüquqi statusu məsələsinə gələn ilin əvvəlində birdəfəlik nöqtə qoyulacaq. Təbii ki, bu da Ulu Öndərin apardığı siyasətin uğurla tamamlanmasıdır və davamıdır ki, Xəzərin hüquqi statusu məsələsi də həll olunacaq. Daha sonra isə Qarabağ məsələsində böyük irəliləyiş əldə olunacaq".