"Artıq Ermənistan rəhbərliyi və xalqı anlayır ki, müharibənin heç bir perspektivi yoxdur. Çünki, bu ölkə gündən-günə həm iqtisadi, həm sosial, həm də hərbi sahədə geriləyir. Belə olan halda, Ermənistan faşizm ritorikasından əl çəkməli, Azərbaycan torpaqlarını işğaldan azad etməlidir". Bu fikirləri Müharibə, Əmək və Silahlı Qüvvələr Veteranları Təşkilatının sədr müavini, ehtiyatda olan polkovnik Cəlil Xəlilov deyib. Onun sözlərinə görə, Ermənistanın müharibə iddiasında olması həm dünya ölkələrində, həm də qonşu dövlətlərdə narahatlıq doğurur: "Çünki, müharibənin olması həm də regionda sabitliyin pozulması deməkdir".
Ehtiyatda olan polkovnik söyləyib ki, Ermənistanın uzun illər iddia etdiyi müharibə variantı bu ölkənin əhalisinin həddindən artıq azalmasına səbəb olub: "Belə olan halda, onlar nəticə çıxarmalı, düşdükləri çətin vəziyyətdən xilas olmaq üçün öz qoşunlarının Azərbaycan torpaqlarından geri çəkərək, ölkəmizlə normal münasibətlərin qurulmasına çalışmalıdırlar. Yalnız bundan sonra Ermənistan beynəlxalq layihələrdə iştirak etmək və rəhbərlik ölkəsini çətin vəziyyətdən qurtarmaq imkanı qazana bilər ".
C.Xəlilov Ermənistan xalqı hazırkı vəziyyətdən xilas olmaq üçün münaqişənin tez bir zamanda həllinə tərəfdardır: "Amma bəzi rəhbərlər bu gün bunu anlamaq, öz ambisiyalarından əl çəkmək istəmirlər. Lakin son Düşənbə görüşündən sonra əldə olunan razılaşmalara Ermənistan tərəfi sadiq qalarsa, o zaman bu məsələlər nizamlanar və sülhün yaranması üçün əlverişli şərait yarana bilər. Təbii ki, Azərbaycan tərəfi bu addımlarla yekunlaşmayacaq və öz torpaqlarını işğaldan azad etmək üçün addımlar atacaq".