Azərbaycan daxilində bəzi qruplar xarici dairələrin dəstəyi ilə ölkəmizdə bu və ya digər məsələlərə müdaxilə etməyə, ictimai-siyasi sabitliyi pozmağa cəhd göstərirlər.
Bunu Trend İnformasiya Agentliyinə müsahibəsində YAP icra katibinin müavini Mübariz Qurbanlı deyib.
Onun sözlərinə görə, bu gün dünyada çox ciddi dəyişikliklər baş verməkdədir. Dünyada mövcud olan yeni çağırış və problemlərə uyğun addımlar atmaq lazımdır.
Mübariz Qurbanlı əlavə edib ki, Prezident İlham Əliyevin apardığı siyasət də Azərbaycanı hər hansı xarici təsirlərdən və təhdidlərdən qorumağa, Azərbaycanın maraqlarını təmin etməyə yönəlib:
"Azərbaycan siyasi, sosial, iqtisadi sahədə çox ciddi uğurlara imza atır. Lakin Azərbaycanın daxilində bəzi qruplar var ki, onlar xarici dairələrin dəstəyi ilə ölkəmizdə bu və ya digər məsələlərə müdaxilə etməyə, ictimai-siyasi sabitliyi pozmağa cəhd göstərirlər. Prezident də vurğuladı ki, Azərbaycan xalqı buna heç zaman imkan verməyəcək. Prezidentin şəxsiyyət, lider olaraq xalqa arxalanması, xalqın da Prezidentə arxalanması sayəsində bu cür cəhdlər beşiyindəcə iflasa uğrayacaq. Azərbaycanda beşinci kolon yaratmaq cəhdləri istənilən nəticəni verməyəcək. Çünki Azərbaycan xalqı müstəqilliyinə, dövlətçiliyinə, milli-mənəvi dəyərlərinə sadiqdir".