Fərəc Quliyev: "Səbirsizliklə bu idman bayramının hansı formada keçiriləcəyini gözləyirlər"

"Avropa Oyunları ilk dəfə keçirildiyi üçün bütün diqqətlər Azərbaycana yönəlib. Azərbaycanı istəyən qüvvələrlə yanaşı, ölkəmizin uğurlarını həzm edə bilməyənlər də səbirsizliklə bu idman bayramının hansı formada keçiriləcəyini gözləyirlər". Bunu Milli Dirçəliş Hərəkatı partiyasının(MDHP) sədri, Milli Məclisin deputatı Fərəc Quliyev deyib. Onun sözlərinə görə, ağa qara deyən qüvvələr olacaq və onlar istənilən yüksək səviyyəli bir işə qara yaxmaq üçün əl atmadıqları çirkinlik qalmayacaq. "Ancaq dəyərləndirənlər təşkilatçılığa qiymət verərkən hər xırda detalı da nəzərə alırlar. Ona görə də Azərbaycana dəyər verib Avropa Oyunlarının ölkəmizdə keçirilməsi üçün müsbət qərar çıxaran Avropa Olimpiya Komitəsi bu idman bayramının təşkilatçılığından heç bir narahatlıq hissi keçirmir. Çünki Azərbaycanın beynəlxalq tədbirləri yüksək səviyyədə təşkil etməkdə böyük təcrübəsi ölkəmizdə keçirilən dünya və Avropa çempionatlarında bunu sübuta yetirib. Digər tərəfdən, Avropanın tarixində ilk dəfə olan bu idman yarışı Azərbaycanın tarixinə qızıl səhifə yazacaq. Olimpiya Oyunlarında Yunanıstanın Olimp dağından od götürüldüyü kimi, Avropa Oyunları zamanı da Azərbaycandan, Bakının Suraxanı rayonundan od götürüləcək.
Avropa Oyunları Azərbaycanın yüksələn imicinə də müsbət təsir göstərəcək. Avropanın digər ölkələrində keçiriləcək Oyunlar zamanı Azərbaycan xatırlanacaq. Bu da dövlətimiz üçün ən önəmli məsələlərdən biridir. Ölkəmizə gələcək 1800-dən artıq media nümayəndəsi təkcə Avropa Oyunlarından yox, ölkəmiz barədə də geniş reportajlar hazırlayacaqlar. Azərbaycanın gerçəkdən tolerant dövlət olması, dinlərarası münasibətlərə verdiyi önəm təbliğ olunacaq. Bu isə Avropa dövlətlərinin ölkəmizə olan diqqətini, marağını daha da artıracaq". F. Quliyev qeyd edib ki, ölkədə tikilən, yenidən qurulan idman infrastrukturları da Azərbaycanın gələcək idman potensialının hansı formada olacağından xəbər verir: "Bu işdə isə böyük əmək sərf edən Avropa Oyunları üzrə Təşkilat Komitəsi çox qısa zaman ərzində böyük işlər gördü. Burada yeni idman komplekslərinin tikintisini, ölkəmizdə və xüsusən də xarici dövlətlərdə Oyunların təbliğinin düzgün və effektiv qurulmasını, təqdimat mərasimlərin keçirilməsini qeyd edə bilərik. Bu qədər böyük həcmli işlərin qısa müddətdə görülməsi yüksək təşkilatçılıq qabiliyyətindən xəbər verir. İnanırıq ki, ölkəmiz Avropa Oyunlarını da yüksək səviyyədə keçirib, tarixə Azərbaycan modeli möhürünü vuracaq".

Əli