"Rusiya Federasiyası daima Azərbaycan və Ermənistanın dövlət işçiləri arasında birbaşa dialoqun davam etdirilməsinə çalışacaq". Bu barədə Ermənistanın xarici işlər naziri Edvard Nalbandyanla İrəvanda birgə mətbuat konfransı keçirən rusiyalı nazir Sergey Lavrov deyib.
Onun sözlərinə görə, Moskva tərəfləri Qarabağ münaqişəsinin həllinə yaxınlaşdıracaq bütün cəhdləri dəstəkləyir.
Mətbuat konfransında qəfildən qalmaqal düşüb. Belə ki, jurnalistlərdən biri Ermənistan XİN rəhbərinə son zamanlar Türkiyə və Rusiya arasındakı yaxşı münasibətlərdən istifadə edərək Moskvanın türk-erməni münasibətlərinin yaxşılaşmasına yardımçı ola bilib-bilməyəcəyini soruşub. Serqey Lavrov buna dərhal əsəbi reaksiya verib: "Siz niyə Rusiyanın edə biləcəklərini Ermənistanın XİN rəhbərindən soruşursunuz?"
Mətbuat konfransında Ermənistanın Avrasiya İqtisadi Birliyinə daxil olub-olmayacağı ilə bağlı mövzuya toxunulmayıb.