Ermənistan ordusunun bir qrup zabiti şübhəli şəxs qismində həbs olunub

Ermənistan ordusunun bir qrup narazı zabiti ölkənin müdafiə naziri Seyran Ohanyanın həyatına sui-qəsd etməyə cəhd edib. Regional Sabitlik və Təhlükəsizlik Mərkəzinin məlumatına görə, bu barədə Ermənistan ordusunun həbsdə olan zabiti David Hakopyanın yaxınları sosial şəbəkələrdə məlumat yayıb.
Xəbərə görə, 2014-cü ilin dekabr ayının 19-da İrəvan şəhər polis idarəsinə S.Ohanyanın avtomobilinə partlayıcı maddə qoyulması barədə məlumat daxil olub. Polis məlumat əsasında dərhal təhlükəsizlik tədbirləri həyata keçirərək nazirin avtomobilində yoxlama aparıb və partlayıcı maddə aşkarlanaraq zərərsizləşdirilib. Hüquq mühafizə orqanları tərəfindən aparılmış ilkin istintaq araşdırması nəticəsində Ermənistan ordusunun bir qrup zabiti şübhəli şəxs qismində həbs olunub.
Regional Sabitlik və Təhlükəsizlik Mərkəzi qeyd edir ki, Ermənistanda son zamanlar hakimiyyət nümayəndələri və müxalifətdəki şəxslər arasında prezidentlik kürsüsü uğrunda açıq şəkildə mübarizə başlayıb. Belə ki, bir müddət əvvəl S. Ohanyan R.Koçaryan qarşıdurması nəticəsində ikincinin himayəsində olan "veteran əfqanlar" qruplaşmasına qarşı Ohanyanın xüsusi təyinatlılardan istifadə etdiyi barədə xəbərlər yayılmışdı. Toqquşma hələ də davam etdiyindən, hadisənin qruplaşma tərəfindən təşkil olunduğu ehtimal olunur. Həmçinin sui-qəsdin növbəti prezidentliyə iddialı olan S.Ohanyanın digər rəqibləri, o cümlədən Serj Sarkisyan tərəfindən planlaşdırılması şübhələr sırasındadır.