Nizami Gəncəvi ili çərçivəsində Ukraynanın Xarkov şəhərinin mərkəzi parklarının birində böyük Azərbaycan mütəfəkkiri Nizami Gəncəvinin abidəsi ucaldılacaq.

Bu barədə BayMedia-ya Azərbaycanın Xarkov şəhərindəki fəxri konsulu Əqfan Salmanov məlumat verib. Əfqan Salmanovun sözlərinə görə, bu il mayın 6-da məsələ ilə bağlı Xarkov Şəhər Şurasına müraciət olunub. Müraciətə cavab olaraq bildirilib ki, Xarkov Şəhər Administrasiyası ilə Azərbaycanın Ukraynadakı səfirliyi arasında imzalanan Əməkdaşlıq Memorandumunun müvafiq bəndində Nizami Gəncəvinin abidəsinin ucaldılması üçün yer ayrılması nəzərdə tutulur. Layihənin maliyyələşməsini Azərbaycan Respublikasının Xarkovdakı Konsulluğu həyata keçirəcək. Açılış mərasimi sentyabrın 1-də, Bilik günündə keçiriləcək.