Qaşıqçı 7 dəqiqə ərzində öldürülüb Dünya

Qaşıqçı 7 dəqiqə ərzində öldürülüb

Almaniyanın "Süddeutsche Zeitung" qəzetinə verdiyi müsahibə verən Türkiyənin xarici işlər naziri M. Çavuşoğlu Camal Qaşıqçı cinayəti ilə bağlı dəhşətli ifadələr işlədib. Səudiyyəli jurnalistin öldürülmə anına aid səs qeydlərini dinlədiyini deyən nazir Qaşıqçının 7 dəqiqə ərzində öldürüldüyünü bildirib. "Gizli xidmətlər mənbələrini açıqlamırlar. Amma mən onları dinlədim. Qaşıqçı 7 dəqiqə ərzində öldürülür. Bu qəsdən adam öldürmədir. Geri dönməyə razı sala bilmədikləri üçün öldürməyə qərar veriblər. Məhkəmə ekspertinin necə təlimat verdiyini eşidirik. Bədəni parçalayarkən musiqi dinləməli idilər. Bunu zövqlə etdiyi məlum olur. O, insanları parçalamağı sevir. Bu, iyrənclikdir", - Çavuşoğlu deyib.
Çavuşoğlu Qaşıqçı cinayətində bir çoxlarının Səudiyyə Ərəbistanının vəliəhd şahzadəsi Məhəmməd bin Salmanı günahkar hesab etməsinə baxmayaraq, ABŞ prezidenti Donald Trampın "Məhəmməd bin Salmanı jurnalist Camal Qaşıqçı cinayətində ittiham etmək üçün kifayət qədər dəlil yoxdur" deməsini şərh edib:
"Trampın niyə belə dediyini bilmirəm. Amerikalıların bizim bilmədiyimiz başqa sübutlara sahib olub-olmadığını da bilmirəm. Amma "bəlkələr" bizim üçün kifayət deyil, əmin olmalıyıq. Bir çox sual var. Türkiyədə cinayətkarlara kimlər kömək etdi, cəsəd haradadır? Səudiyyə hakimiyyəti bizdən məlumatları istəyirlər, amma bizə məlumat vermirlər. Yerli işbirlikçilərin robot şəkillərini göndərmək istədilər. Niyə robot şəkil? Səudiyyəlilər adlarını artıq bilirlər".