Polad Bülbüloğlu: "Yəni proses deyil, nəticə vacibdir"

"1997-ci ildən fəaliyyət göstərən Minsk qrupu hələ də lazım olan nəticəni əldə edə bilməyib".
Bu sözləri Azərbaycanın Rusiyadakı səfiri Polad Bülbüloğlu TASS agentliyinə müsahibəsində deyib. O bildirib ki, BMT TŞ-nin 3 daimi üzvünü özündə birləşdirən format kifayət qədər ciddi görünür: "Məhz bu 3 ölkə nəhəng siyasi yükə və müvafiq təcrübəyə malikdir, Rusiya isə nəinki coğrafi olaraq Cənubi Qafqaza yaxındır, həmçinin bizi ortaq tarixi bağlar birləşdirir. Azərbaycan tərəfi hər zaman bəyan edir ki, münaqişənin həlli istiqamətində lazımi addımlar atmağın vaxtı gəlib çatıb. Azərbaycan torpaqlarının işğalı ilə xarakterizə olunan mövcud status-kvo qəbuledilməzdir. Bu barədə 2009-2013-cü illərdə qəbul olunan bəyanatlarında həmsədr ölkələrin başçıları da qeyd ediblər. Hazırda real nəticələr əldə etmək məqsədilə substantiv danışıqların davam etdirilməsi şəraitini təmin etmək lazımdır. Bir daha qeyd edim ki, danışıqlar predmet xarakterli olmalıdır. Yəni proses deyil, nəticə vacibdir".
"Azərbaycanın nümayəndəsi kimi bu gün qlobal səviyyədə qarşılaşdığımız və YUNESKO-nun səlahiyyətləri çərçivəsində ən kəskin problemlərə fəal töhfə vermək bacarığımızı yüksək qiymətləndirirəm"-deyən
Polad Bülbüloğlu qeyd edib ki, 18 il Azərbaycanın Mədəniyyət Nazirliyinin rəhbəri olduğu dövrdə heç bir muzey, teatr, musiqi məktəbi, kitabxana bağlanmayıb: "Bundan əlavə, 1994-2008-ci ildə rəhbəri olduğum Beynəlxalq Beynəlxalq Türk Dünyası Mədəniyyət Təşkilatında, həmçinin 2002-2004-cü illərdə MDB-də rəhbəri olduğum Mədəni Əməkdaşlıq üzrə Şura çərçivəsində beynəlxalq əməkdaşlığa dair uğurlu formatlar tapa bilmişəm".
Bülbüloğlunun fikrincə, belə təcrübə və bacarıqlarının olması onun özünü YUNESKO üçün uğurlu namizəd hesab etməsinə imkan verir: "Şans bütün layiqli namizədlərdə var. Odur ki, seçkiləri gözləyək".
Qeyd edək ki, Azərbaycanın Rusiyadakı səfiri Polad Bülbüloğlu YUNESKO-nun baş katibi olmaq üçün namizədliyini irəli sürüb.