Qoşulmama Hərəkatının XVIII zirvə görüşünə hazırlıq çərçivəsində keçirilən xarici işlər nazirlərinin görüşü öz işini yekunlaşdırıb.
Bunu nazirlərin görüşünün yekunları ilə bağlı media nümayəndələrinə açıqlamasında Xarici İşlər Nazirliyinin mətbuat xidmətinin rəhbəri Leyla Abdullayeva bildirib.
L.Abdullayevanın sözlərinə görə, interaktiv formatda keçirilən görüş zamanı nazirlər oktyabrın 25-26-da Bakıda keçiriləcək Qoşulmama Hərəkatı dövlət və hökumət başçılarının XVIII sammiti zamanı dövlət və hökumət başçılarına təqdim olunacaq 4 sənədi müzakirə edərək razılaşdırıblar:
“Bu sənədlər Bakı Zirvə Görüşünün yekun sənədi, Bakı Siyasi Bəyannaməsi, Fələstin üzrə Bəyannamə və Ev sahibiliyi dövlətə Təşəkkür Bəyannaməsindən ibarətdir”.
Qeyd edək ki, Bakı sammitində Qoşulmama Hərəkatına sədrlik 3 il müddətinə Azərbaycana keçəcək.