İqtisadi və infrastrukturla bağlı təzyiqlərə baxmayaraq, Ər-Riyad eyni zamanda fəal şəkildə diplomatik həll yolu axtarır: Omanın vasitəçilik kanallarından istifadə edərək, müvəqqəti atəşkəs və husilərlə birbaşa danışıqlar üçün yeni təşəbbüslər irəli sürüb. Bu taktiki diplomatiyanın əsas məqsədi, heç olmasa, gərginliyin artması dinamikasını müvəqqəti olaraq dayandırmaq və kritik dəniz marşrutlarına birbaşa təsiri minimuma endirməkdir.

Xalqcebhesi.az xəbər verir ki, bunu Yaxın Şərq üzrə ekspert Vasili Papava deyib.

"Formalaşmaqda olan bu arxitekturada ABŞ, İran, regional vasitəçilər və potensial müttəfiqlər kimi kənar oyunçular eyni vaxtda həm taktiki manevr imkanları yaradır, həm də Ər-Riyadın müstəqil qərar qəbul etmək imkanlarını kəskin şəkildə məhdudlaşdırıla" - o, qeyd edib.

Papavanın fikrincə, Səudiyyə Ərəbistanının milli təhlükəsizliyi bu gün təcrid olunmuş təhdidlərlə deyil, onların mürəkkəb və qarşılıqlı əlaqəli məcmusu ilə müəyyən edilir: Hörmüz boğazındakı həssaslıq avtomatik olaraq Qırmızı dənizin strateji əhəmiyyətini artırır, Yəməndə husi mövqelərinin möhkəmlənməsi isə bu yeganə "həyat damarı" alternativini yeni, yüksək riskli bir zonaya çevirir:

"Mövcud böhran şəraitində Krallığın hərtərəfli strategiyası üç əsas sütuna əsaslanır: diplomatik kanalları qoruyub saxlamaq, həm özünün, həm də koalisiyanın hərbi imkanlarını mütənasib şəkildə gücləndirmək və hər iki strateji boğaz ətrafındakı mühasirə halqasını yarmaq üçün istənilən, hətta qismən belə olsa, mexanizmi axtarıb tapmaq.

Nəhayət, bütün qlobal enerji təchizatı sisteminin sabitliyi, təkcə Səudiyyə Ərəbistanı iqtisadiyyatının və təhlükəsizliyinin dayanıqlılığı deyil, məhz bu elementlərin nə dərəcədə səmərəli şəkildə əlaqələndirilə bilməsindən asılıdır".

Cavid